Menntaskólinn við Hamrahlíð

Kór MH heldur tvenna tónleika á Miklagarði laugardaginn 7. nóvember kl. 16 og kl. 18. Hefðbundin kórverk hljóma í bland við frumflutning verka. Í tilefni af 60 ára afmæli skólans var efnt til tónverkakeppni og á tónleikunum mun Kór MH frumflytja verðlaunaverk keppninnar eftir tónskáldið Björn Önund Arnarson. Gestakór verður Kammerkórinn Huldur sem fagnar 5 ára afmæli á þessum tónleikum. Huldur frumflytur verkið 8:20 eftir Kolbein Bjarnason við ljóð Sóleyjar Mjallar Ásgeirsdóttur, nemanda í MH. Verkið hlaut sérstaka viðurkenningu dómara í tónverkakeppninni. Almennt miðaverð: 3.000 kr. / Eldri borgarar og öryrkjar: 2.000 kr. / Frítt fyrir námsmenn. Ágóði sölunnar rennur í ferðasjóð kórsins. Miðasala: https://tix.is/event/22508/omi-songur-i-hamranna-hlidÓmi 

Guðmundur Flóki vann til silfurverðlauna á alþjóðlega stigamótinu Dracula Open í taekwondo í Búkarest í Rúmeníu um helgina. Hann vann fjóra bardaga á leið sinni í úrslit í flokki undir 87 kílóum, meðal annars gegn keppendum sem hafa tekið þátt á Ólympíuleikum eða eru meðal tíu efstu á heimslistanum. Guðmundur Flóki keppir alla jafna í flokki undir 80 kílóum og er þar í 22. sæti heimslistans. Hann keppti þó að þessu sinni í þyngri flokki. „Ég var í rauninni að prófa nýjan þyngdarflokk á mótinu og fór ekki með neinar væntingar. En maður fer nú alltaf inn með sama hugarfarið og reynir að gera sitt besta í hverjum bardaga og komast lengra,“ segir Guðmundur Flóki við RÚV.

Verkefni undir merkjum Grænfánans eru unnin í áfanganum Umhverfisfræði. Í haust fékk skólinn afhentan sinn þriðja Grænfána og var hann dreginn að húni í gær sem hluti af dagskrá umhverfisdaga í skólanum. Margs konar verkefni hafa verið unnin m.a. undir þemunum loftslagsbreytingar, orka, neysla, vatn og náttúruvernd.

Japönskunemendur í MH fengu góða gesti í heimsókn í dag þegar borgarstjóri Tama í Japan, ásamt fríðu föruneyti, kíkti í kennslustund til þeirra. Gestirnir voru mjög forvitnir um íslenska skólakerfið og íslenska nemendur.

Það er gaman að segja frá því að annar hönnuður bleiku slaufunnar í ár er MH-ingurinn Tanja Levý. Slaufan varð til samhliða krabbameinsmeðferð Tönju og veitir einstaka innsýn í ferlið þegar krabbamein kollvarpar tilverunni. Baráttukveðjur frá MH og við hvetjum ykkur öll til að kaupa bleiku slaufuna.  

Frægðar- og mikilmenni margskonar hafa komið í MH. Ekkert þeirra hefur þó haft jafnmikil áhrif á nemendur eins og hin 89 ára Teruko Yahata sem hélt áhorfendum hugföngnum þegar hún sagði frá einstakri reynslu sinni síðastliðinn miðvikudag.

Nemendur í áfanganum íslenskar draugasögur, ÍSLE2BÚ05, fóru í heimsókn á elliheimilið Grund á dögunum, ásamt kennara sínum Elvu Brá. Þau lásu frumsamdar og einnig gamlar draugasögur fyrir heimilisfólkið. Einnig sögðu þau frá atburðum úr samtímanum sem komu frá þeim sjálfum eða voru sögusagnir. Heimsóknin vakti mikla lukku heimilisfólksins og fengu nemendur safa og nammi í verðlaun.