Umhverfismál

Stefna, markmið og aðgerðaáætlun

MH hefur sett sér umhverfis- og loftslagsstefnu sem og markmið og aðgerðaáætlun í loftslagsmálum. Fyrsta aðgerðaáætlunin náði yfir árin 2020-2023 og áætlun áranna 2024 til og með 2026 gildir frá 1. janúar 2024.

Verkefni tengd umhverfismálum

Skólinn tekur þátt í tveimur verkefnum sem tengjast umhverfismálum.

Græn skref
Verkefnið Græn skref (opnast í nýjum glugga) er skipulagt af Umhverfisstofnun fyrir ríkisstofnanir sem vilja draga úr neikvæðum umhverfisáhrifum af starfsemi sinni og efla umhverfisvitund starfsmanna. Grænu skrefin eru 5 talsins og þann 8. desember 2023 náði MH að ljúka þeim öllum. MH náði fyrsta skrefinu um miðjan febrúar 2021, öðru 3. nóvember, því þriðja 20. desember 2021 og fjórða skrefið var stigið 4. nóvember 2022. Fimmta skrefið felst í því að stofnanir setji á fót eigið umhverfisstjórnunarkerfi og fagnar skólinn því að búa nú yfir slíku kerfi.

Skólar á grænni grein
Skólar á grænni grein (opnast í nýjum glugga) er oft kallað Grænfánaverkefni. Það er alþjóðlegt umhverfismenntarverkefni sem rekið er af Landvernd á Íslandi. Markmið verkefnisins er að auka umhverfismennt, menntun til sjálfbærni og að styrkja umhverfisstefnur skóla. Verkefnið er stærsta umhverfismenntaverkefni í heimi og er haldið úti af samtökunum Foundation for Environmental Education. Skólar á grænni grein stíga 7 skref í umhverfismálum og þegar því marki er náð fá skólarnir leyfi til að flagga Grænfánanum næstu tvö ár. Sú viðurkenning fæst endurnýjuð ef skólarnir halda áfram góðu starfi. Grænfáninn var fyrst dreginn að húni í MH í febrúar 2016 og í annað sinn í nóvember 2019.

Grænt bókhald

Skólinn færir grænt bókhald á hverju ári. Það veitir margvíslegar upplýsingar um kaup skólans á vörum og þjónustu og þar er kolefnisspor skólans reiknað. Grænt bókhald er hjálpartæki til að setja markmið um minni losun gróðurhúsalofttegunda. 

Niðurstöður græns bókhalds í MH fyrir árið 2023 og samanburð við fyrri ár má finna í þessu skjali: Grænt bókhald 2023.