Forvarnastefna

Markmið Menntaskólans við Hamrahlíð er að efla alhliða forvarnir og heilsuvernd. Í því felst m.a.

• að taka þátt í verkefninu Heilsueflandi framhaldsskóli (tengill opnast í nýjum glugga),

• að stuðla að heilbrigðum lífsháttum og traustri sjálfsmynd nemenda,
• að koma í veg fyrir tóbaksnotkun, áfengisneyslu og aðra vímuefnanotkun nemenda,
• að styðja nemendur sem vilja losna úr ánauð vímuefna.

Leiðir skólans að þessum markmiðum felast einkum í starfi forvarnafulltrúa, skýrum reglum og almennri fræðslu. Þá leggur skólinn áherslu á fjölbreytni í líkamsræktarkennslu og að nemendum bjóðist hollur matur á hóflegu verði innan skólans.

Forvarnafulltrúi
Hlutverk forvarnafulltrúa er:

• að samhæfa forvarnafræðslu fyrir nemendur og starfsfólk,
• að vera til viðtals fyrir nemendur, starfsfólk og þá sem skólanum tengjast,
• að aðstoða nemendur sem vilja hætta neyslu og styðja nemendur sem hafa valið sér líf án áfengis, tóbaks og ólöglegra vímuefna.
• að vera talsmaður forvarnastefnunnar og fylgja henni eftir í samráði við stjórnendur.

Fræðsla um forvarnir
Fræðsla um forvarnir og heilbrigða lífshætti hefst í lífsleikniáfanga á fyrstu námsönn. Hún er enn fremur tengd námsefni kjarnaáfanga í félagsfræði og náttúrufræði og er órofa hluti af líkamsræktarkennslu sem nær yfir allan námstímann. Auk fræðslu um fíkniefni og skaðleg áhrif þeirra er komið inn á mataræði, átraskanir, kynlíf, kynsjúkdóma, sjálfsmynd o.fl. Öllum kennurum er ætlað að stuðla að framgangi forvarnastefnunnar.