Fréttir

Stundatöflur eru tilbúnar í Innu og opnast Inna eftir kl. 16:00 hjá þeim sem greitt hafa skólagjöldin. Nemendur sem voru í MH á síðustu vorönn geta gert töflubreytingar í gegnum Innu til og með föstudeginum 16. ágúst. Eftir það fara töflubreytingar fram hjá námstjórum. Aðrir nemendur sem eru að koma úr grunnskóla eða öðrum framhaldsskólum, geta komið í MH og hitt námstjóra ef þeir telja sig þurfa breytingar á stundatöflunni. Námstjórar verða við milli kl. 10 og 14 þriðjudaginn 13. ágúst og miðvikudaginn 14. ágúst. Allir nýir MH-ingar eru boðaðir í skólann fimmtudaginn 15. ágúst kl. 13:00.

Skrifstofa skólans er lokuð frá og með 24. júní og opnar aftur eftir sumarfrí 8. ágúst kl. 10:00. Við bjóðum alla nýja MH-inga velkomna i skólann og hlökkum til að sjá ykkur í haust. Upplýsingar hafa verið senda út í tölvupóst til ykkar og má einni lesa hér á heimasíðunni . Gleðilegt sumar.

Frá og með næsta hausti 2024 geta afreksíþróttanemendur sem stunda nám við MH sótt um að íþróttaiðkunin verði hluti af náminu. Fyrirkomulagið er hugsað fyrir þá sem vilja ná langt í sinni íþróttagrein og skilgreina sig sem afreksíþróttafólk. Íþróttagreinin sem viðkomandi nemandi stundar þarf að vera viðurkennd af Íþróttasambandi Íslands (ÍSÍ) og íþróttafélagið aðili að sérsambandi innan ÍSÍ. Þeir sem eru að sækja um nám við MH þurfa að geta þess á umsókn að þeir sæki um afreksíþróttaval. Iðkun nemanda í afreksíþróttum getur numið allt að 25 einingum, þ.e. einingar í afreksíþróttum geta komið í stað eininga í líkamsræktaráföngum og frjálsu vali á brautum skólans, þ.e. frá 10-25 einingum. Nemendur sem sækja um afreksíþróttaval verða boðaðir á fund með fagstjóra í líkamsrækt í upphafi haustannar.

Brautskráðir voru 128 nemendur frá Menntaskólanum við Hamrahlíð af sex námsbrautum. Flestir útskrifuðust af opinni braut eða 69 nemendur, 24 af náttúrufræðibraut, 6 af félagsfræðabraut, 3 af málabraut, 5 af listdansbraut og 21 nemandi af IB-braut. Alls voru 18 nemendur brautskráðir með ágætiseinkunn á stúdentsprófi, þ.e. vegin meðaleinkunn yfir 9,00. Að þessu sinni var dúx skólans Gabríela Albertsdóttir, stúdent af náttúrufræðibraut, með 9,76 í meðaleinkunn. Gabríela hlaut einnig viðurkenningu fyrir ágætan námsárangur í stærðfræði frá Íslenska stærðfræðafélaginu. Semidúx var Ollie Birki Sánchez-Brunete sem útskrifaðist af opinni braut með áherslu á myndlist og sálfræði með 9,59 í meðaleinkunn. Ollie Birki hlaut einnig viðurkenningu fyrir ágætan námsárangur í frönsku og myndlist.

Upplýsingar um hvar kennarar eru á staðfestingardegi og í prófsýningu má finna hér á heimasíðunni.

Útskrifaðist þú frá MH? Það er gaman að segja frá því að margar útskriftarmyndir frá árinu 1973 til dagsins í dag eru komnar á heimasíðuna. Ekki er búið að klára verkefnið en þeirri vinnu ætti að ljúka fljótlega.

Í dag, þriðjudag, er síðasti prófdagur skv. próftöflunni og eru það sálfræði og danska sem eiga síðasta orðið. Á morgun og fimmtudaginn eru nokkrir að taka sjúkrapróf og þá er ekkert annað eftir en að bíða eftir einkunnum. Ef einhverjar einkunnir sjást í Innu, fyrir próf sem tekin voru á prófatíma þá teljast þær vinnueinkunnir og geta breyst. Einkunn telst ekki fullkomin fyrr en við höfum tilkynnt að svo sé. Áætlað er að einkunnir birtist eftir kl. 16:00 föstudaginn 18. maí. Gangi ykkur vel á lokametrunum.

Í kvöld, síðasta vetrardag, héldu nemendur á fjölnámsbraut í MH, stórglæsilega hæfileikakeppni fyrir starfsbrautir framhaldsskólanna. MH vann keppnina 2023 og var því gestgjafinn í ár. 8 skólar voru með atriði sem voru af ýmsum toga og sýndu nemendur mikla og fjölbreytta hæfileika. Einvalalið var í dómnefnd og fóru leikar þannig að Fjölbrautaskólinn í Garðabæ sigraði, MH varð í öðru sæti og Flensborgarskólinn í Hafnarfirði í því þriðja. Við óskum öllum sem tóku þátt innilega til hamingju og takk fyrir glæsilegt kvöld. Gaman að enda veturinn á þennan hátt. Gleðilegt sumar.

Starfsfólk og nemendur fóru út í góða veðrið í hádeginu í dag og tíndu rusl af lóð skólans. MH hefur tekið þátt í Stóra plokkdeginum undanfarin ár en það er liður í aðgerðum fræðsluáætlunar í umhverfismálum. Vorveðrið lagðist á sveif með duglegum MH-ingum og sá til þess að öll gátum við notið útiverunnar og unnið þarft verk í leiðinni.

Nemendur á fyrra árinu í IB fóru á Þingvelli með kennurum sínum í efnafræði, eðlisfræði og líffræði og unnu þverfaglegt verkefni á fallegum degi í fallegri náttúru. Í ferðinni voru nemendur að velta fyrir sér loftslagsbreytingum og áhrifum þeirra á vistkerfi Þingvalla. T.d. voru þau að skoða lífríkis Þingvallavatns, mengun á svæðinu, ferðaþjónustu í héraðinu, jarðvarmavirkjunar í kringum svæðið, náttúrvernd og ýmislegt fleira. Verkefnið kallast CSP (Collaborative sciense project) og munu nemendur kynna niðurstöður sínar á Miðgarði 23. apríl milli 16:00 og 17:00. Markmiðið er að allir nemendur árgangsins vinni saman að því að skoða "Global issue in local context". Markmið skv. fyrirmælum IB er að hafa ALLA nemendur árgangsins að vinna saman til að skoða "Global issue in local context". Nemendur áttu að velja sér rannsóknarspurningu í þessu samhengi og vinna saman í litlum hópum.