Fréttir

Brautskráðir voru 78 nemendur frá Menntaskólanum við Hamrahlíð af fimm námsbrautum. Flestir útskrifuðust af opinni braut eða 49 nemendur, 19 af náttúrufræðibraut, 4 af félagsfræðabraut, 5 af málabraut og 1 af listdansbraut. Fimm nemendur voru brautskráðir með ágætiseinkunn á stúdentsprófi, þ.e. vegin meðaleinkunn yfir 9,00. Að þessu sinni var dúx skólans Elín Katla Henrysdóttir nemandi á náttúrufræðibraut með 9,26 í meðaleinkunn. Elín Katla hlaut auk þess viðurkenningu fyrir ágætan námsárangur í líffræði og efnafræði. Semidúx var Sunna Björg Friðjónsdóttir sem útskrifaðist af náttúrufræðibraut með 9,24 í meðaleinkunn. Ávarp fyrir hönd nýstúdenta fluttu Álfheiður Karlsdóttir og Baldur Steindórsson. Kór skólans undir stjórn Hreiðars Inga Þorsteinssonar gegndi stóru hlutverki og flutti nokkur verk auk þess sem aðrir kórfélagar og nýstúdentar fluttu tónlist.

Við erum búin að opna fyrir einkunnir í Innu og um leið geta nemendur skoðað valið sitt og staðfest það fyrir næstu önn.

Prófum er lokið og einkunnir munu birtast í Innu eftir hádegi 17. des. Mánudaginn 19. desember er staðfestingardagur þar sem nemendur geta hitt umsjónarkennarana sína og farið yfir valið fyrir næstu önn. Umsjónarkennarar eru við milli klukkan 10:00-11:00 og má sjá staðsetningu þeirra hér á heimasíðunni.

Allir sem sóttu um skólavist hjá okkur fyrir vorönn 2023 fengu í dag póst með upplýsingum um næstu skref. Það er alltaf gaman að taka á móti nýju fólki og erum við í MH mjög spennt að hitta ykkur öll í janúar.

Í dag eru nemendur að þreyta stærðfræðipróf og sjálfsagt hefur mikið gengið á við undirbúninginn fyrir þau. Lagið "reiknaðu með mér" sem Björn Jörundur og Ragnheiður Gröndal syngja svo skemmtilega, hefur kannski verið sungið inn á milli dæma til að dreifa huganum.

Í kjölfar þess að nöfn nokkurra nemenda við MH voru rituð á spegla og víðar á salerni skólans þann 3. október síðastliðinn og þau ýmist beint eða óbeint tengd kynferðislegri áreitni eða ofbeldi, bárust skólanum kvartanir um einelti frá nemendum sem töldu að nöfn þeirra hefðu að ósekju verið rituð þar eða að öðru leyti verið tengd umfjölluninni. Skólinn vísaði málunum til ráðgjafahóps á vegum mennta- og barnamálaráðuneytisins sem settur var á laggirnar til þess að skoða slík mál.

Í dag voru skólagjöld lögð á alla nemendur sem voru í fullu námí í MH á haustönn og ætla að halda áfram á vorönn. Eindagi skólagjaldanna er 21. desember.

Fyrsti prófdagur er á morgun 1. desember og vonandi verðið þið öll til í slaginn. Ef svo óheppilega vill til að þið verðið veik á prófdegi þá þarf að tilkynna það í Innu samdægurs, fyrir kl. 14.00. Passa þarf upp á að skrifa í athugasemd í hvaða prófi veikindin eru.

Í dag var síðasti kennsludagur haustannar 2022. Á morgun er námsmatsdagur þar sem kennarar vinna að námsmati og nemendur fá tækifæri til að skipuleggja prófatörnina sem framundan er. Gangi ykkur sem best í prófunum.

Í dag var boðið upp á síðasta hafragraut annarinnar. Guðmundur IB stallari og Dagný forstöðukona bókasafnsins sáu um að ausa grautinn og buðu að sjálfsögðu líka upp á rúsínur í tilefni jólanna. Hafragrauturinn þakkar fyrir sig þessa önn og mætir aftur til leiks á nýju ári.