Fréttir

Frönskukeppni grunn- og framhaldsskólanema sem haldin er árlega af Félagi frönskukennara, Franska sendiráðinu á Íslandi og Alliance française var haldin laugardaginn 23. mars. MH-ingar hrepptu 1. og 2. sæti. Í sigurliðinu voru Ernir Ómarsson, Nanna Kristjánsdóttir og Unnur Aldred. Í 2. sæti voru Elínborg Una Einarsdóttir, Hekla Martinsdóttir Kollmar, Hrafnhildur Einarsdóttir og Sunna Tryggvadóttir. Við óskum þeim innilega til hamingju.

Úrslit Pangea á Íslandi voru haldin í Menntaskólanum við Hamrahlíð um helgina. 86 nemendum hvaðanæva af landinu var boðið að taka þátt eftir að hafa komist í gegnum tvær undankeppnir. Keppnin var nú haldin í fjórða skipti á Íslandi og voru 3352 nemendur úr 8. og 9. bekk skráðir til leiks. Þátttökuskólar voru samtals 68. Að lokinni keppni var boðið uppá veitingar og skemmtiatriði áður en úrslit voru tilkynnt. Nánar upplýsingar um Pangea má finna hér.

Hafdís Ósk Hrannarsdóttir stóð sig mjög vel í úrslitakeppninni í líffræði. Hafdís Ósk varð í 3. sæti og vann sér sæti í landsliðinu. Hafdís Ósk stundar nám á IB-braut skólans og mun útskrifast í vor. Við óskum henni til hamingju með þennan glæsilega árangur.

Dagana 14. - 16. mars standa yfir framhaldsskólakynningar í Laugardalshöll. Þar eru framhaldsskólar landsins að kynna sig og starfsemi sína. Námsráðgjafar verður á svæðinu og taka vel á móti gestum. Miðvikudaginn 20. mars verður svo opið hús í MH frá kl. 17:30 - 19:00

18. almenna landskeppnin í efnafræði fór fram í framhaldsskólum landsins fimmtudaginn 28. febrúar. Alls tók 141 nemandi þátt, úr sex skólum. Tómas Ingi Hrólfsson hafnaði í 6. sæti og Jón Klausen í 12. sæti. Þeir Tómas Ingi og Jón hafa unnið sér þátttökurétt í úrslitakeppninni sem fer fram í Háskóla Íslands 23.-24. mars nk. Við óskum þeim innilega til hamingju með árangurinn.

Leikfélag NFMH sýnir söngleikinn "Ógleymanlegur söngleikur um ást , dauða og vonbrigði" í MH. Þetta er mjög skemmtileg sýning og hvetjum við alla til að líta við. Sýningin er í MH og miðar eru seldir á tix.is. Nú er rétti tíminn til að skella sér á söngleik. Sýningar standa yfir til 28. mars.

Kór Menntaskólans við Hamrahlíð hefur nú lokið tónleikaferð sinni um Suðurland sem lukkaðist vel. Sungið var fyrir aldraða á dvalarheimili á Hellu, fyrir grunnskóla á Hvolsvelli og í Reykholti, Biskupstungum. Sungið var fyrir menntaskólanema á Laugarvatni og haldnir voru tónleikar í Vík, á Selfossi og í Skálholti. Í Skálholti hélt kórinn sameiginlega tónleika með Kór Menntaskólans að Laugarvatni og Kór Kvennaskólans.

Tómas Ingi Hrólfsson, nemandi í MH, vann Stærðfræðikeppni framhaldsskólanna sem fram fór á laugardaginn. 35 nemendur tóku þátt í keppninni og var sigur Tómasar Inga afgerandi þar sem hann hlaut 59 stig af 60 mögulegum. Til hamingju Tómas Ingi. Nánar má lesa um keppnina á mbl.

Óli Hilmar Briem Jónsson arkitekt og málari og eignkona hans Kristín Salóme Jónsdóttir gáfu skólanum málverk eftir Óla Hilmar. Þau útskrifuðust frá MH fyrir rúmlega 40 árum og vilja þakka fyrir sig með því að afhenda skólanum málverkið Krossá. Við þökkum fyrir okkur sömuleiðis og munum finna málverkinu góðan stað í skólanum.

Í hádeginu 1.mars fá nemendur MH heimsókn á Matgarð frá dönskum tónlistarskóla. Í bréfi frá skólanum stendur "The event will be a mix of music and information about the concept of the Danish Folk Highschool (højskolen) and Den Rytmiske Højskole". Með í för er "... Anna Hansen who is a musician and will play some songs. Anna has some Icelandic connections so she should speak Icelandic". Við tökum vel á móti dönsku gestunum á Matgarði í hádegishléinu.