Fréttir

Í síðustu viku bauðst nemendum MH að skrá sig í raddprufur fyrir kór Menntaskólans við Hamrahlíð. Fyrsti dagurinn er í dag og mæta þá þeir sem skráðu sig í mánudagsprufurnar. Á miðvikudaginn verða svo raddprufur fyrir þá sem skráðu sig í miðvikudagsprufurnar. Ef einhver gleymdi að skrá sig þá má sá hinn sami senda Hreiðari Inga kórstjóra póst, fyrir fimmtudaginn, og athuga með tíma í raddprufu. Fyrstu tónleikar kórsins verða á fundi fyrir foreldra nýnema sem verður þriðjudaginn 7. september. Það verður gaman að fá að sjá og heyra í kórnum þá með nýja meðlimi innanborðs.

Við í MH tökum spennt á móti nemendum í dag og hefst skólinn kl. 9:00. Nemendur mæta í stofurnar sínar skv. stundaskrá og byrjar tíminn á stuttri rafrænni skólasetningu rektors. Nýnemar skólans fá sérstaka athygli í dag frá nemendafélaginu-NFMH og verður ýmislegt gert til að bjóða þau velkomin í skólann. Matarvagnar verða á bílaplaninu milli 11:15 og 12:50 þar sem flestir ættu að geta keypt sér eitthvað við hæfi í tilefni dagsins. Það er vegna þeirra sem bílaplanið fyrir framan skrifstofuna er lokað. Ef einhver á eftir að láta laga stundatöfluna sína þá eru námstjórar og áfangastjóri tilbúin að taka á móti breytingum á skrifstofu skólans. Gleðilegt nýtt skólaár.

Þar sem við erum því miður ekki laus við Covid-19 þá þurfum við að ítreka sóttvarnarreglur svo að skólahald getið gengið sem best fyrir sig. Grímuskylda er í skólanum en taka má grímur niður þegar nemendur hafa fengið sér sæti i kennslustofum. Virðum nándarmörk, þ.e. einn metra. Mælt er með að sótthreinsa borð á milli kennslustunda og gæta að persónubundnum sóttvörnum. Borðum í kennslustofum er raðað upp með einum metra á milli nemenda. Kennslustofur verða opnar á milli tíma. Ekki mega fleiri en 200 koma saman í samkomurýmum skólans, t.d. Matgarði, Miðgarði og Norðurkjallara. Forðumst hópamyndanir. Mælt er að með að nota rakningarapp heilbrigðisyfirvalda. Ferðalangar sem eru að koma erlendis frá, verða að fara í skimun innan 48 tíma frá komu. Því má ekki koma í skólann fyrr en niðurstaða úr skimun er ljós.

Um 15 MH-ingar unnu í sumar á Suðurlandsbraut við ýmis störf tengd Covid-19. Þau voru t.d. að aðstoða við að blanda bóluefni, unnu við skráningar ýmiskonar, sýnatökur, keyrslur hraðprófa og að svara almennum fyrirspurnum sem komu í gegnum Heilsuvera.is Flestir nemendur voru í EFNA3DL05 í vor og nokkrir voru á IB-1 og IB-2 .

Við stefnum á að hefja skólastarf með hefðbundnum hætti þetta haustið og þurfum að hugsa vel um sóttvarnir. Reglur sem gilda í MH í samræmi við reglugerð heilbrigðisráðherra má lesa hér á heimasíðunni undir Covid-19 hnappnum. Við þurfum öll að gera okkar besta í sóttvörnum og gera það saman.

Gleðilega önn. Seinna í dag verður Inna opnuð og þá munu stundatöflur birtast hjá þeim sem greitt hafa skólagjöldin. Allar nánari upplýsingar má lesa undir skólinn, tölvupóstar til nemenda. Töflubreytingar hefjast í dag og allir eldri nemendur skólans geta gert töflubreytingar í Innu en aðrir sem eru að hefja nám hjá okkur í fyrsta skipti núna í haust þurfa að koma og hitta námstjóra ef þeir telja sig þurfa töflubreytingar. Nýnemakynning verður 18. ágúst kl. 13:00 eða kl. 14:30. Fyrsti kennsludagur verður 19. ágúst og hefst kl. 9:00. Athugið að lesa vel póstana sem vísað er í hér í fréttinni.

Inna er lokuð hjá öllum nemendum, þó að nemendur hafi greitt skólagjöld, þar sem verið er að vinna í stundatöflugerð. Á fimmtudag eða föstudag munu stundatöflur opnast í Innu hjá þeim sem greitt hafa skólagjöldin, en þangað til er Inna lokuð hjá öllum. Við viljum því minna þau ykkar sem ekki hafa greitt skólagjöldin á að gera það hið fyrsta. Í framhaldinu verður opnað fyrir töflubreytingar hjá eldri nemendum sem voru í MH á síðustu önn. Nýnemar haustsins munu fá póst fyrir lok vikunnar um hvernig þeir þurfa að bera sig að ef þeir þurfa töflubreytingar.

Þá er haustönn 2021 framundan og við í MH að koma okkur í stellingar. Skrifstofan hefur opnað aftur eftir sumarfrí og er opin frá kl. 8:30 til 12:00 og frá 12:30 til 15:30. Nánari upplýsingar um byrjun haustannar 2021 koma um leið og þær liggja fyrir.

Skrifstofan er farin í sumarfrí frá og með 23. júní og opnar aftur mánudaginn 9.ágúst kl. 10:00. Búið er að senda bréf til nýnema, nýrra MH-inga, sem við bjóðum hjartanlega velkomin í skólann. The school office will be closed from the 23rd of June and we will open again on the 9th of August.

Innritun eldri nýnema í MH er lokið og bjóðum við ykkur öll hjartanlega velkomin. Skólagjöldin ættu að birtast í heimabanka á föstudag eða mánudag. Eindaginn er 7. júlí. Nánari upplýsingar voru sendar í tölvupósti í dag. Í dag er síðasti dagur fyrir 10. bekkinga að sækja um skólavist fyrir haustið og verður lokað fyrir umsóknir á miðnætti.