Fréttir

Í dag halda kórarnir í Hamrahlíð upp á prófalok og sumarkomu með skemmtun í hátíðarsal Menntaskólans við Hamrahlíð. Þetta er hið árlega Vorvítamín, sem kórarnir bjóða til. Allir eru velkomnir og aðgangur er ókeypis. Kórfélagar, nú í vor rúmlega 100 talsins, halda tvenna tónleika, kl. 14 og kl. 16. Efnisskrár tónleikanna eiga að vekja með öllum vorhug og sumargleði, þar er að finna blöndu gamalla gersema og nýrra. Kórarnir flytja m.a.tónlist eftir Atla Heimi Sveinsson, Hjálmar H. Ragnarsson, Jón Ásgeirsson, Jón Nordal, Jón Þórarinsson, Misti Þorkelsdóttur og Snorra S. Birgisson. Einnig  verða sungin sumar- og ættjarðarlög og vonast er til að allir gestir taki undir með kórunum. Milli tónleika verður kaffisala og ýmis skemmtiatriði kórfélaga, hljóðfæraleikur, ævintýraheimur fyrir krakka, bangsaspítali, vísindahorn, kennsla í salsa, heilsuhorn, leyniatriði og fl. Þá verða seld sumarblóm og ágóði af sölu rennur í ferðasjóð Hamrahlíðarkóranna. Nú í sumar verður Hamrahlíðarkórinn fulltrúi Íslands á Aberdeen International Youth Festival sem er eina alþjóðlega listahátíðin í Evrópu þar sem flytjendur eru allir ungt fólk. Fögnum björtum dögum og köllum á hlýindin með kórunum í Hamrahlíð í dag.

Nú  eru einkunnir nemenda fyrir vorönn aðgengilegar í Innu. Þá geta nemendur staðfest val sitt ef þeir þurfa ekki að gera neinar breytingar. Öllum nemendum er skylt að staðfesta val sitt fyrir næstu önn ætli þeir sér að stunda nám í skólanum þá. Sjá nánari lýsingu á staðfestingarferli í Áföngum fréttabréfi frá skólanum um val og staðfestingu Prófasýning í Dagskóla og Öldungadeild verður þann 19. maí milli kl. 12 og 13. Ef breyta þarf vali þá er listi yfir þá áfanga sem verða í boði í haust aðgengilegur hér á heimasíðunni. 

Munið prófasýningu fyrir bæði dagskóla og öldungadeild kl. 12-13 föstudaginn 20. maí.

Föstudaginn 20. maí Viðtalstími valkennara kl. 9-11. Prófasýning dag og öld um hádegi (kl. 12-13). Lokadagur fyrir staðfestingu vals. Staðfestingu lýkur kl 14:00.

Þessa dagana eru próf í dagskólanum. Próftöfluna sjá nemendur í Innu en einnig er hægt að sjá ýmsar upplýsingar varðandi prófreglur, prófstjórn og yfirlitstöflu prófa með því að velja flipann Námið hér að ofan og smella svo á Próf í lista til vinstri. Við minnum nemendur og alla sem eiga erindi til okkar að ganga hljóðlega um á prófatíma svo nemendur í prófum nái að uppskera sem mest.

Föstudaginn 29. apríl kveðja dimitantar kennara og aðra starfsmenn skólans. Fyrst bjóða þau öllum í morgunmat á Matgarði kl. 7:30 og síðan kveðja þau með athöfn á sal kl. 11:10 - 12:10.

Farið verður til Þingvalla, með tilheyrandi sögu- og náttúruskoðun og heimsókn í Írafossvirkjun, í dag, 27. apríl kl. 12:10.  Mætið með nesti, í góðum skóm og í skjólgóðum fötum.

Föstudagurinn 15. apríl er síðasti kennsludagur fyrir páska. Í dymbilviku verður skrifstofa skólans opin milli 10:00 og 14:00 á mánudegi og þriðjudegi. Eftir páska verður skrifstofan opnuð kl. 8:30 þriðjudaginn 26. apríl. Kennsla hefst aftur að loknu páskaleyfi miðvikudaginn 27. apríl kl. 8:10.

IB nemendur stóðu fyrir styrktartónleikum og basar í Smáralind þann 9. apríl. Tónleikarnir voru skipulagðir í samstarfi við Rauða kross Íslands og báru yfirskriftina “Sýnum Japan samstöðu”.  Alls söfnuðust 150.000 krónur sem renna til fórnarlamba hamfaranna í Japan.