Fréttir

Opnað verður fyrir einkunnir í dag kl. 16:00. Um leið verður opnað fyrir að nemendur geti staðfest valið sitt í Innu. Áður en þið staðfestið þurfið þið að skoða valið ykkar vel og athuga t.d. hvort að þið hafið fengið hraðferðarheimild í ENSK3CH05 eða ÍSLE3CH05 og breyta valinu skv. því. Á morgun, 18. desember, er staðfestingardagur sem hefst með fundi nemenda við umsjónarkennara sína og prófsýning sem hefst kl. 11:15 og er til 12:15. Sjá nánar hér á heimasíðunni.

Sinfóníuhljómsveit Íslands, ásamt kór Menntaskólans við Hamrahlíð og Kammerkórnum Huldur eru þessa dagana að flytja töfrandi og æsispennandi tónlist John Williams á meðan uppáhalds jólamynd margra kynslóða, Aleinn heima eða Home Alone er sýnd í Hörpu. Hreiðar Ingi Þorsteinsson er kórstjóri beggja kóranna og þarna er enn eitt skemmtilega samstarfið í gangi. Frábærir tónleikar sem gefa myndinni enn jólalegri blæ.

MH ásamt framhaldsskólunum í Reykjavík er aðili að samstarfsyfirlýsingu vegna barna í viðkvæmri stöðu í Reykjavík. Yfirlýsingin miðar að því að þróa áfram samvinnu á grundvelli laga og stefnu Reykjavíkurborgar til að tryggja umönnun og vernd barna gegn ofbeldi eða annarri vanvirðandi háttsemi.

Nú þegar prófin standa yfir er mikilvægt að huga vel að líkama og sál. MH-ingurinn Guðmundur Flóki Sigurjónsson gerði það með óhefðbundnum hætti núna um helgina þegar hann hélt til Rúmeníu á Balkan Open mótið í taekwondo. Þar gerði hann sér lítið fyrir og sigraði sinn flokk örugglega. Til hamingju með árangurinn!

Veikindi á prófdegi verður að tilkynna samdægurs, fyrir kl. 14:00, í gegnum Innu, alveg á sama hátt og gert er þegar kennsla stendur yfir. Nauðsynlegt er að tilgreina heiti áfangans í athugasemd. Í lok hvers prófdags fer prófstjóri yfir skráðar veikindatilkynningar í Innu, staðfestir þær og veitir upplýsingar um sjúkraprófstíma. Staðfestingin sést í Innu viðkomandi nemenda og forsjáraðila og kemur einnig fram í tölvupósti. Prófstjóri hefur netfangið profstjori@mh.is og er með viðtalstíma milli 10 og 11 alla daga. Sjúkrapróf eru gulmerkt á próftöflunni og hefjast í flestum tilfellum kl. 14:00. Athugið að þetta á ekki við um sjúkrapróf fyrir IB og Fjölnámsbraut. Nemendur sem eru forfallaðir af öðrum orsökum en veikindum þurfa að hafa samband við skrifstofu skólans í síma 595-5200.

Lokaprófin hófust í dag 2. desember skv. próftöflu. Nemendur sjá sína eigin próftöflu í Innu og þar kemur líka fram klukkan hvað prófin byrja. Nemendur sem hafa sótt um að breyta prófi þurfa að athuga að próftaflan í Innu hefur ekki breyst og allar upplýsingar um breyttan próftíma er í tölvupósti til hvers og eins frá prófstjóra. Passið vel upp á að skoða þetta vel svo þið missið ekki af prófi. Allir nemendur fengu tölvupóst frá prófstjóra þar sem farið er yfir helstu atriði varðandi próftökur í MH. Þar er einnig hlekkur á HVAR PRÓFIN ERU STAÐSETT Í HÚSINU HVERJU SINNI . Þessar upplýsingar verða einnig settar á upplýsingaskjáina í skólanum - skólaskjáinn. Gangi ykkur sem best og munið að huga vel að hreyfingu, næringu og svefni á meðan á prófatímabili stendur.

Nemendur í MH kjósa skólastjórnarfulltrúa einu sinni á ári. Nýr skólastjórnarfulltrúi heitir Guðrún Lilja Ólafsdóttir og er nemandi á öðru ári í MH. Skólastjórnarfulltrúi er fulltrúi nemenda á skólastjórnarfundum og kemur hann hugmyndum nemenda á framfæri. Um leið og við bjóðum Guðrúnu Lilju velkomna til starfa þá þökkum við Eyju fyrir hennar störf.

Í dag ganga nemendur MH til skuggakosninga. Skuggakosningar eru kosningar þar sem framhaldsskólanemar kjósa sína fulltrúa á Alþingi og munu endurspegla vilja nemenda um allt land. Skuggakosningar fara fram í fimmta sinn hér á landi þann 21. nóvember. Niðurstöður verða gerðar opinberar eftir að kjörstöðum lokar á kjördag alþingiskosninga, 30. nóvember. Nemendur í stjórnmálafræði sjá um framkvæmdina í MH og er hægt að kjósa til kl. 16:00. 

Nemendur í stjórnmálafræði fóru í áhugaverða heimsókn í Hæstarétt í dag. Nemendur fjölmenntu og sýndu mikinn áhuga og spurðu góðra spurninga. Lesa má meira um heimsóknina á heimasíðu Hæstaréttar

Snævar Örn Kristmannsson nemandi í MH og nemandi í Menntaskólanum í tónlist vann til 10 verðlauna á Íslandsmeistaramótinu í sundi um helgina. Hann fékk tvö silfur og tvö brons í unglingaflokki og eitt silfur og eitt brons í opnum flokki karla. Auk þess varð hann fjórfaldur Íslandsmeistari fatlaðra á sama móti. Til hamingju með glæsilegan árangur.