Fréttir

Skrifstofa skólans hefur opnað að loknu sumarleyfi. Á þessari stundu er óljóst hvernig skólahaldi verður háttað vegna samkomutakmarkana sem ríkja. Von er á nýjum upplýsingum frá sóttvarnarlækni um samkomutakmarkanir þann 13. ágúst og verður gefið út í kjölfarið hvernig skólahaldi verður háttað við upphaf haustannar. Stefnt er að því að taka á móti nýnemum þann 18. ágúst og munu nýnemar fá póst með nánari upplýsingum þegar nær dregur. Skólinn mun fylgja þeim relgum sem almannavarnir og sóttvarnarlæknir hafa sett um samkomur og skólahald. Nánari fréttir verða settar á heimasíðuna í vikunni og eru nemendur hvattir til að fylgjast vel með.

Skrifstofa MH opnaði 6. ágúst og er opin frá 9:00-15:00 til og með 12. ágúst. Frá og með 13. ágúst verður hefðbundinn opnunartími, þ.e. frá 8:30-15:30.

Í dag bættust rúmlega 270 nemendur við MH-stórfjölskylduna. Til hamingju með daginn MH-ingar og sjáumst á kynningunni 18. ágúst.

Dagana 15.-23. júní er opnunartími skrifstofu 9:00-15:00. Skrifstofan lokar frá og með 24. júní og opnar aftur 6. ágúst. Inna er lokuð hjá nemendum fram í ágúst. Við óskum nemendum og starfsfólki gleðilegs sumars.

Jafnlaunakerfi MH hefur hlotið vottun frá vottunarstofunni iCert og í kjölfarið hefur Jafnréttisstofa veitt MH heimild til að nota Jafnlaunamerkið. Þetta þýðir að jafnlaunakerfi MH uppfyllir kröfur stjórnunarstaðalsins ÍST 85:2012. Jafnlaunakerfi MH byggir á launa- og jafnlaunastefnu skólans. Markmið skólans er að starfsfólk óháð kyni njóti sömu launakjara fyrir sömu eða jafnverðmæt störf.

Brautskráðir voru 153 nemendur frá Menntaskólanum við Hamrahlíð af átta námsbrautum. Að þessu sinni útskrifuðust flestir af opinni braut eða 73 nemendur, 27 af náttúrufræðibraut, 19 af félagsfræðabraut, 4 af málabraut, 3 af listdansbraut, 1 af tónlistarbraut, 3 af sérnámsbraut og 23 af IB-braut (International Baccalaureate). Brautskráningin fór fram í tveimur hópum, þ.e. kl. 13:00 og 15:00. Fjöldi gesta í húsi var takmarkaður við 200 manns og því kom aðeins hluti kórs skólans fram og aðeins einn gestur var leyfður á hvert útskriftarefni auk þess sem starfsfólk skipti sér upp á báðar athafnirnar. Athöfninni var streymt á vefinn svo að fólk heima í stofu gæti horft á.

Brautskráning nemenda verður föstudaginn 29. maí. Athöfnin fer fram á Miklagarði hátíðarsal skólans og hefst kl. 13:00 fyrir nemendur á opinni braut og framhaldsskólabraut. Kl. 15:00 verða brautskráðir nemendur á öðrum brautum skólans en samtals verða 153 nemendur af átta námsbrautum brautskráðir. Athöfninni verður streymt inn á https://livestream.com/accounts/15827392/events/9122745 Graduation ceremony will be held on Friday May 29th. The ceremony takes place in Mikligarður the school auditorium starting at 13:00 for students in the multi-disciplinary study and special education study. At 15:00 students in other study programs will graduate. A total of 153 students from eight study programs will graduate this spring. The ceremony will be streamed online on the following website: https://livestream.com/accounts/15827392/events/9122745

Í dag var prófsýning og staðfestingardagur fyrir nemendur MH. Nemendur hafa því skoðað prófin sín og staðfest valið fyrir komandi haustönn. Þeir nemendur sem ekki hafa staðfest valið þurfa að setja sig í samband við valkennara/umsjónarkennara sinn og klára staðfestingu með þeim. Þetta þarf að klárast í dag svo hægt sé að ganga frá áfangaframboði haustannar.

Náms- og starfsráðgjafar og námstjórar verða til viðtals milli kl. 9:00 og 15:00 þriðjudaginn 26. maí eða fimmtudaginn 28. maí til að aðstoða nemendur sem hyggjast taka áfanga í öðrum skólum í sumar. Nemendur eru hvattir til að nýta sér þessa aðstoð. Ekki þarf að bóka tíma.

Prófsýning verður með óhefðbundnu sniði þetta vorið. Kennarar í hverjum áfanga fyrir sig hafa látið nemendur vita hvernig prófsýning verður í þeirra áfanga. Þar sem prófin fóru fram á netinu þá eru lausnir og athugasemdir oftast sýnilegar í Innu um leið og einkunnir hafa verið birtar og því lítil þörf á eiginlegri prófsýningu. Ef svo er ekki, munu kennarar í þeim áföngum vera við í MH á prófsýningardaginn 25.maí, millli 10:00 og 12:00. Þeir nemendur sem munu koma í MH eru beðnir um að fylgja því að nemendur með nöfn frá A til Í komi kl. 10:00 og nemendur með nöfn frá J til Ö komi kl 11:00 - allt til að fylgja sóttvarnarreglum eins vel og hægt er. Vegna framkvæmda þarf að ganga inn í skólann um innganginn undir bókasafninu.