Fréttir

Breytt próftafla í vor er aðgengileg hér. Prófað verður viku síðar en áætlað var og standa prófin frá 9. maí til 20. maí að meðtöldum laugardögunum 10. og 17. maí. Uppröðun prófa er óbreytt að því undaskildu að vegna ferðar spænskuáfanga hafa próf í spænsku og frönsku verið færð milli daga. Próftaflan verður fljótlega aðgengileg hverjum nemanda í Innu. Umsóknarfrestur vegna breytinga á próftöflu verður auglýstur síðar.

Samningar við kennara hafa verið undirritaðir og verkfalli þar með aflýst. Skóli hefst því á venjulegum tíma á mánudagsmorguninn.

Mánudag og þriðjudag í dymbilviku, 14. og 15. apríl, verður skólinn opinn frá 10:00. Bókasafn, námsráðgjöf, námstjóraskrifstofa og skrifstofa verða opin til kl. 14:00. Nemendur geta nýtt sér sameiginleg svæði, tölvur og prentara. Hægt er að sækja um aðgang að skólastofum milli 10:00 og 14:00. Nú er um að gera að nýta tímann vel!

Nú liggur fyrir að ekki næst að semja við kennara fyrir boðað verkfall 17. mars. Meðan verkfallið varir fellur niður öll kennsla annarra en fáeinna stundakennara. Eftir sem áður hafa nemendur aðgang að bókasafni og almennum vinnusvæðum.

MH er sigurvegari í spurningakeppni íslenskra framhaldsskóla, Gettu betur, en liðið fór með sigur af hólmi í viðureign kvöldsins gegn Borgarholtsskóla. Þórgnýr, Leifur Geir og Kristinn Már skiluðu langþráðum hljóðnemanum til MH í kvöld. Vel gert og til hamingju öll!

Hringt verður út úr tíma kl. 12 í dag 14. mars til fundar á sal.  Rektor fer í stuttlega yfir stöðuna vegna verkfalls sem gæti hafist á mánudag.  

Í dag, 13. mars er dagur líkamsvirðingar. Líkamsvirðing felst í því að bera virðingu fyrir líkama sínum og annarra. Það þýðir að við hugsum vel um líkamann okkar og hugsum fallega til hans. Í ár er þessum skilaboðum sérstaklega beint til ungs fólks. Í dag eru 40% stúlkna í kjörþyngd annað hvort að reyna að léttast eða telja sig þurfa að léttast. Tölfræðilegt samband ríkir milli líkamsþyngdar og lífsánægju stúlkna. Önnur hver unglingsstúlka á Íslandi fer í megrun og vaxandi fjöldi ungra drengja. Þegar komið er upp í framhaldsskóla uppfyllir einn af hverjum tíu nemendum greiningarviðmið fyrir átröskun. Þetta er ekkert náttúrulögmál. Þetta eru afleiðingar umhverfisskilyrða sem við höfum skapað börnunum okkar. Þeim þarf að breyta ef við óskum þeim bjartari framtíðar. Verum ánægð með okkur!

Miðvikudaginn 12. mars verður opið hús í MH frá kl. 17:00-19:00 fyrir grunnskólanema og forráðamenn þeirra. Í opnu húsi verður námsframboð, inntökuskilyrði og félagslíf skólans kynnt. Námstjórar, kennarar, stjórnendur og náms- og starfsráðgjafar munu sitja fyrir svörum um námsframboð og annað sem gestum liggur á hjarta varðandi nám við skólann. Náms-og starfsráðgjafar verða með glærusýningu um brautir skólans og ýmsar gagnlegar upplýsingar fyrir þá sem huga á nám hér í M.H. Nemendur kynna félagslíf nemenda og NFMH Glæsilegt bókasafn skólans verður opið gestum og einnig gefst tækifæri til þess að kíkja í hinar ýmsu kennslustofur. Kór Menntaskólans við Hamrahlíð syngur kl. 18:00

Skólinn fékk góða heimsókn í dag þegar  fiðluleikarinn Midori sem er meðal kunnustu tónlistarmanna heims spilaði á Miklagarði, hátíðarsal skólans. Ferill hennar spannar ríflega 30 ár en hún vakti heimsathygli þegar hún kom fram með Fílharmóníusveit New York aðeins ellefu ára gömul. Síðan þá hefur hún verið einn af eftirsóttustu fiðluleikurum veraldar. Midori sinnir samfélagsstörfum af mikilli elju og óskar eftir því að fá að heimsækja stofnanir, skóla og aðra þá staði þar sem hún getur kynnt tónlist fyrir gestum og gangandi. Stokkfullur hátíðarsalur hlustaði af þvílíkri innlifun að heyra hefði mátt saumnál detta meðan Midori spilaði undurvel. Í lok tónleikanna svaraði Midori spurningum úr salnum sem bæði voru fjölbreyttar og skemmtilegar. Takk fyrir okkur!

Sjá frétt hér neðar á síðunni með leiðbeiningum og tenglum.